Tveir reknir úr framkvæmdastjórn FIFA

Alþjóða knattspyrnusambandið, FIFA, tók í dag þá ákvörðun að reka tvo úr framkvæmdastjórn FIFA vegna spillingarmáls sem kom upp vegna lokakeppni heimsmeistaramótsins 2018 og 2022. Nígeríumaðurinn Amos Adamu fékk þriggja ára bann og Reynald Temari sem er fulltrúi Eyjaálfu í framkvæmdastjórninni fékk eitt ár í bann en þeir þurfa að auki að greiða háar sektir.

Breska dagblaðið Sunday Times kom upp um þá félaga en þeir voru grunaðir um að hafa þegið fé fyrir atkvæði sín í kosningu framkvæmdastjórnarinnar um hvar lokakeppni HM færi fram 2018 og 2022. Blaðamaður á þeirra vegum þóttist vera fulltrúi frá Bandaríkjunum og bauð þeim 800 þúsund pund í skiptum fyrir atkvæði þeirra.

Bandaríkin og England voru á meðal þeirra þjóða sem lögðu fram boð í keppnirnar tvær. Bandaríkin dró svo tilboð sitt í keppnina sem haldin verður 2018 til baka og í kjölfarið drógu Englendingar boð sitt í 2022-keppnina til baka.

Alls voru sex aðilar úrskurðaðir í bann hjá FIFA en fjórir aðrir aðilar sem áður gegndu ábyrgðarstöðum í framkvæmdastjórn FIFA fengu einnig bann.

FIFA mun kjósa um hvar lokakeppni HM fer fram árið 2018 og 2022 þann 2. desember. Adamu og Temarii verða ekki með kosningarétt í því kjöri. Aðeins 22 munu greiða atkvæði í stað 24.

Claudio Sulser, formaður siðanefndar FIFA sem fór yfir málið gerði grein fyrir ákvörðun FIFA í dag en hann gagnrýndi þrátt fyrir það fréttamennsku Sunday Times sem kom upp þá félaga. Englendingar eru á meðal þeirra þjóða sem hafa óskað eftir lokakeppninni árið 2018 og telur Sulser að enskir fjölmiðlar geri allt til þess að koma höggi á keppinauta þeirra í því kjöri.