Ferguson: Frábært afrek hjá Berbatov

Alex Ferguson, stjóri Manchester United, hældi Dimitar Berbatov fyrir frammistöðuna gegn Blackburn í dag.

Berbatov skoraði fimm mörk í 7-1 sigri United en hann hafði ekki skorað í tíu leikjum í röð fyrir United.

Hann er fjórði leikmaðurinn í sögu ensku úrvalsdeildarinnar sem skorar fimm mörk í einum og sama leiknum.

Með sigrinum komst United á topp ensku úrvalsdeildarinnar í fyrsta sinn á tímabilinu.

„Þetta var frábært afrek," sagði Ferguson eftir leikinn. „Hann hefði vel getað bætt einu marki við og skorað alls sex því að Paul Robinson varði frábærlega frá honum undir lokin."

„Framerjir sem ekki skorar heldur að hann sé að gera eitthvað rangt. Þannig hefur það alltaf verið. En í dag kom hann til baka."

Aðrir leikmenn sem hafa skorað fimm mörk í leik í úrvalsdeildinni eru Andy Cole, Alan Shearer og Jermain Defoe.