Ragnhildur Steinunn sögð kona Eiðs Smára á vef Sky Sports

Í umfjöllun fréttavefs Sky Sports er sjónvarpskonan Ragnhildur Steinunn Jónsdóttir sögð vera unnusta Eiðs Smára Guðjohnsen.

Þetta birtist í umfjöllun Sky Sports um eiginkonur og kærustur leikmanna í ensku úrvalsdeildinni (e. wives and girlfriends eða WAG). Þar er Ragnhildur Steinunn fulltrúi Stoke, félagsins sem Eiður Smári er á mála hjá.

Þetta er vitanlega ekki rétt. Unnusta Eiðs Smára heitir vissulega Ragnhildur en er Sveinsdóttir.

Ragnhildur Steinunn er þó sannarlega unnusta fótboltamanns en maður hennar er Keflvíkingurinn Haukur Ingi Guðnason - sem væntanlega er ekkert allt of kátur með umfjöllun Sky.

Umfjöllunina má lesa hér. Myndina sem Sky notaði af Ragnhildi Steinunni má sjá á kvikmyndavefnum imdb.com, hér.