Umfjöllun: Takk, búið, bless KR

KR-ingar eiga einn leik eftir í Evrópukeppninni þetta árið. Þeir töpuðu 0-3 fyrir úkraínska liðinu Karpaty Lviv í fyrri viðureign liðanna og ljóst að markmið þeirra fyrir seinni leikinn ytra verður bara að reyna að komast frá verkefninu með sæmd.

Karpaty er einfaldlega tveimur númerum of stórt fyrir Vesturbæjarliðið sem átti ekki möguleika í þessari rimmu. Eftir markalausan fyrri hálfleik gerðu gestirnir út um leikinn í upphafi þess síðari.

Fyrri hálfleikurinn fer ekki í sögubækurnar fyrir fjörlegheit. KR-ingar voru vel varnarsinnaðir og mættu Karpaty aftarlega í leikkerfinu 4-5-1. Óskar Örn Hauksson og Kjartan Henry Finnbogason voru á köntunum en fengu mun meira hlutverk í varnarleiknum en þeir eru vanir og leit Óskar á köflum út eins og bakvörður.

Ljóst var strax í byrjun að það er mikið varið í þetta úkraínska lið, það var meira með boltann í fyrri hálfleik en KR-ingar gáfu sárafá færi á sér. Í nokkur skipti skapaðist þó einhver hætta við mark Vesturbæinga og markvörðurinn Lars Ivar Moldsked þurfti í eitt skipti að taka á honum stóra sínum.

Það voru þó KR-ingar sem áttu bestu sókn fyrri hálfleiks. Þeir minntu á sig eftir rúmlega hálftíma leik. Björgólfur Takefusa fékk frábært færi, honum tókst ekki að koma fæti í boltann sem barst á endanum á Viktor Bjarka Arnarson en varnarmaður náði að bjarga marki með því að komst fyrir boltann.

Staðan markalaus eftir fyrri hálfleik en sá seinni var aðeins 22 sekúndna gamall þegar Karpaty tók forystuna. Aleksandr Guruli átti þá skot fyrir utan teig sem hafnaði í netinu, skotið var ekki fast og verður að setja spurningamerki við Lars Ivar í markinu.

Úkraínumennirnir létu kné fylgja kviði og bættu við marki fimm mínútum síðar. Andriy Tkachuk skoraði af stuttu færi eftir góða fyrirgjöf. Á 57. mínútu gerðu þeir svo algjörlega út um leikinn með glæsilegu marki Brasilíumannsins William Batista Rocha.

KR-ingar voru fyrirsjáanlegir í sóknarleik sínum og gerðu sig ekki mjög líklega í seinni hálfleiknum. Karpaty var líklegra til að bæta við en KR að minnka muninn ef eitthvað var en gat tekið lífinu með ró enda 3-0 forysta alveg nægilegt veganesti heim til Úkraínu. KR mætti einfaldlega ofjörlum sínum í þessum leik.