Má draga hlutleysi Halldórs í efa

Sérfræðingur í sveitastjórnalögum vill ekki fullyrða um hvort Halldór Jónsson skoðunarmaður reikninga Kópavogsbæjar sé vanhæfur til að gegna því starfi þótt hann hafi fengið rúmlega 70 milljónir króna greiddar frá bænum vegna annarra starfa. Það sé þó hægt að draga hlutleysi hans í efa í þeim efnum þar sem hann þiggi greiðslur frá bænum á sama tíma og hann yfirfari reikninga hans.

Í kvöldfréttum á föstudag var greint frá því að Halldór Jónsson, skoðunarmaður reikninga bæjarins fyrir hönd Sjálfstæðisflokks hafi fengið greiddar rúmlega sjötíu milljónir króna með virðisauka frá bænum á árunum 2003-2008. Greiðslurnar fékk hann í gegnum fyrirtæki sitt Hallstein ehf, fyrir ýmiskonar hönnunar-og eftirlitsstörf á þessu tímabili.

Hlutverk skoðunarmanna sveitarfélaga er að yfirfara ársreikninga þeirra og önnur mál. Samkvæmt 69.gr. sveitastjórnarlaga mega þeir ekki vera aðal- eða varamenn í sveitarstjórnum og heldur ekki starfsmenn sveitarfélaga.

Sesselja Árnadóttir er lögfræðingur og höfundur handbókar um sveitastjórnarlögin. Hún vill ekkert fullyrða um hvort Halldór sé vanhæfur til að gegna starfi skoðunarmanns þótt hann hafi þegið greiðslur upp á rúmlega sjötíu milljónir vegna annarra starfa fyrir bæinn.

„Ég get ekki tjáð mig um þetta einstaka tilvik en hæfisákvæðin eru þau að skoðunarmenn sveitarfélaga séu ekki starfsmenn þeirra. Spurningar sem má velta upp í þesu tilviki er hvort viðkomandi er að fá það miklar greiðslur frá sveitarfélaginu þannig að þær teljist í rauninni hans aðalinnkoma og hvort það megi jafna við það að hann teljist starfsmaður. Það er því ekki hægt að fullyrða hér og nú hvort hann sé vanhæfur eða hæfur til að gegna þessu verkefni."

Sesselja segist ekki vita til þess að sambærileg tilvik í stjórnsýslunni hafi komið upp en það sé túlkunaratriði hverju sinni. „Það má alveg draga í efa hvernig maður getur verið hlutlaus ef hann er fjárhagslega háður öðrum aðila almennt séð," segir Sesselja og á þá við Kópavogsbæ í þessu tilviki.

Hún segir að þetta horfi við sem mjög áhugavert lögfræðilegt efni og virkilega sé ástæða til að fá niðurstöðu réttra aðila um hvort þetta sé lögmætt eða ekki. Samgönguráðuneytið eigi að úrskurða um slíkt.