Houllier og Carew semja frið

Svo virðist sem að þeir Gerard Houllier, stjóri Aston Villa, og leikmaðurinn John Carew hafi samið frið þegar þeir hittust á fundi í gær.

Um helgina létu þeir ýmislegt flakka í viðtali við fjölmiðla. Fyrst sakaði Carew stjórann sinn um að bera ekki næga virðingu fyrir sér þar sem Houllier sagði að Carew þyrfti að sýna að hann væri þess verðugur að fá nýjan samning við Villa.

Houllier svaraði fyrir sig og sagði Carew heimskan fyrir að láta þetta frá sér. Núverandi samningur Carew rennur út í lok leiktíðarinnar.

Í gær birtist yfirlýsing á heimasíðu Villa þar sem kom fram að málið hefði verið tekið fyrir og rætt. Það væri nú leyst.

Enskir fjölmiðlar halda þó áfram að gera sér mat úr þessu og segja Houllier nú reiðubúinn að selja Carew í janúar næstkomandi. Hann er nú frá keppni vegna meiðsla.