Coyle: Frábær frammistaða

Owen Coyle hrósaði sínum mönnum í Bolton eftir 4-2 sigurinn á Tottenham í ensku úrvalsdeildinni í dag.

Grétar Rafn Steinsson skoraði eitt mark fyrir Bolton sem komst í 3-0 í leiknum. Það var ekki fyrr en undir lok leiksins að Tottenham komst í takt við leikinn.

„Ég held að við séum að batna með hverjum leiknum," sagði Coyle. „Vonandi er þetta allt í rétta átt hjá okkur."

„Leikmenn stóðu sig mjög vel og mér fannst þetta frábær frammistaða hjá þeim. Maður hefur alltaf áhyggjur þegar staðan er 3-2, sérstaklega miðað við hvað Tottenham er með gott lið. En leikmenn mínir eiga hrós skilið fyrir að skora og klára leikinn 4-2."

Harry Redknapp, stjóri Tottenham, var allt annað en ánægður með varnarleik sinna manna í leiknum.

„Þetta eru auðvitað mikil vonbrigði en þetta var erfiður leikur. Bolton hætti aldrei," sagði Redknapp.

„Við reyndum að vera þéttir fyrir í fyrri hálfleik en lentum marki undir. Því setti ég annan sóknarmann inn á og breytti í 4-4-2. Við það galopnaðist allt hjá okkur og það var vandamálið í dag."