Lykilmenn United léku veikir í dag

Nemanja Vidic, Patrice Evra og Paul Scholes léku allir með United gegn Wolves í dag þrátt fyrir veikindi. Sá síðastnefndi gat ekki einu sinni æft í gær.

Sjálfur hefur Alex Ferguson verið að berjast við flensu í vikunni en mætti á völlinn í dag á 24 ára starfsafmæli sínu hjá félaginu.

United vann leikinn gegn Wolves, 2-1, með tveimur mörkum frá Ji Sung Park. Sigurmarkið kom í uppbótartíma.

„Það var mikið afrek hjá okkur að ná þessum sigri í dag," sagði Ferguson eftir leikinn. „Þetta var erfiður leikur, sérstaklega í ljósi þess hversu margar breytingar við þurftum að gera."

Margir leikmenn United eiga við meiðsli að stríða og því ákvað Ferguson að láta Owen Hargreaves byrja í dag en hann hefur verið að glíma við erfið meiðsli í tvö ár.

„Við tókum áhættu með því að láta Owen Hargreaves spila. Við gerðum það til að vera með reynslumikla miðjumenn á vellinum en hann entist í aðeins fimm mínútur. Þetta var skelfilegt stórslys," sagði Ferguson.

Hargreaves hefur verið meiddur á hné en meiddist á vöðva aftan á læri í dag. „Það var alveg ótrúlegt að það skuli hafa gerst nú," sagði Ferguson.

„Þá þurftum við að setja Bebe inn á. Hann er efnilegur leikmaður en er enn að læra."