Wenger: Þurfum að sýna að við séum tilbúnir í titilbaráttu

„Við höfum unnið fleiri leiki og munum sækja til sigurs í þessum leik," segir Arsene Wenger, knattspyrnustjóri Arsenal, fyrir stórleikinn gegn Manchester United í ensku úrvalsdeildinni í kvöld.

„Við höfum verið að byggja upp gott lið og nú er tækifærið fyrir okkur að sýna að við séum tilbúnir að berjast um titilinn. Við vitum að við þurfum að sanna fyrir fólki að við séum klárir í stóru leikina," segir Wenger. „Þetta er enginn úrslitaleikur en þó geta úrslitin haft sálfræðileg áhrif það sem eftir er tímabilsins."

Það eru fleiri stórleikir framundan hjá Arsenal en liðið mætir Chelsea milli jóla og nýárs. Veikasti hlekkur Arsenal er klárlega varnarleikurinn en Wenger er þó bjartsýnn fyrir framhaldið.

„Leikurinn í kvöld gæti orðið vendipunktur á tímabilinu og við erum meðvitaðir um það. Varnarlega teljumst við ekki nægilega sterkir en við höfum tækifæri á að afsanna það núna," segir Wenger.

Stóra spurningin er hvort Cesc Fabregas verði með Arsenal. Wenger hefur sagt harla litlar líkur á að Fabregas verði með en reynslan segir manni að það megi búast við öllu. Samir Nasri verður allavega á sínum stað en hann hefur verið sjóðheitur.

The Sun segir frá því að Pólverjinn tvítugi Wojciech Szczesny gæti staðið í markinu hjá Arsenal í kvöld en hann er þriðji markvörður liðsins. Lukasz Fabianski og Manuel Almunia eru báðir tæpir en þó líklegra en ekki að annar hvor þeirra standi í ramminum.