Richard Branson verður flugfreyja í einn dag

Sir Richard Branson, stjórnarformaður Virgin Group, hefur lofað að klæða sig upp eins og flugfreyja hjá Air Asia X og þjóna flugfarþegum á leiðinni frá London til Kuala Lumpur. Branson tapaði nefnilega veðmáli við eiganda flugfélagsins Tony Fernandes sem snérist um Formúlu1.

Báðir eiga kapparnir lið í Formúlunni og veðjuðu þeir um hvort liðið myndi enda hærra á stigatöflunni í móti ársins. Hvorugt liðið náði reyndar í eitt einasta stig, en Lotus lið Fernandes gekk þó betur og því tapaði Branson.

Hann þarf því að dressa sig upp og fara í háa hæla, og það fylgir sögunni að hann þurfi einnig að þrífa klósettið í vélinni. Reyndar er líklegt að flugsætin verði boðin upp og þá mun Branson fá að ráða því hvaða góðgerðarstofnun nýtur góðs af.