Hugmynd um styttri opnunartíma gölluð

Borgarfulltrúi Vinstri grænna hefur sagt sig úr nefnd um endurskoðun opnunartíma skemmtistaða vegna óánægju með vinnubrögð nefndarinnar. Hann hyggst leggja fram tillögu um að öllum skemmtistöðum í miðborginni í nálægð íbúðabyggðar verði ekki lokað seinna en klukkan þrjú. Veitingamaður segir hugmyndina gallaða.

Þorleifur Gunnlaugsson, borgarfulltrúi Vinstri grænna, sagði sig úr stýrihóp um afgreiðslutíma skemmtistaða í gær vegna óánægju með aðgerðarleysi hópsins, en hann hefur verið að störfum síðan í maí í fyrra. Þorleifur segir kornið sem fyllti mælinn vera íbúafund nú á fimmtudag. Fundurinn hafi ekki verið marktækur sem álit íbúa miðbæjarins þar sem hann sé litaður af hagsmunaaðilum sem tóku þátt í fundahöldunum.

Hann hyggst leggja fram tillögu á borgarráðsfundi á fimmtudaginn kemur í samræmi við hugmyndir íbúa um opnunartíma skemmtistaða. Þorleifur segir þó vel koma til greina að hafa skemmtistaða opna lengur þar sem ekki er verið að trufla íbúa á nóttinni.

Kormáki Geirharðssyni, veitingamanni, líst illa á að stytta afgreiðslutíma skemmtistaða til klukkan þrjú í einu vetfangi.

„Ég held að við ættum að spyrja til dæmis leigubílstjóra hvort þeir geti tekið við öllu fólki klukkan þrjú og hvort lögreglan geti séð um fólkið sem kemur allt út klukkan þrjú. Það verður líka að athuga að eru nokkur þúsund fleiri að skemmta sér í Miðbænum núna samborið við það þegar síðast var opið til klukkan þrjú," segir Kormákur.

Samkvæmt heimildum fréttastofu íhugar stýrihópurinn að leggja til styttingu rýmri opnunartíma skemmtistaða um alls klukkustund, úr hálfsex að morgni í hálffimm. Styttingin muni vera í áföngum um hálftíma í hvort skipti, en Kormákur segir þá leið skömminni skárri.