Henry vill ekki gefa nein loforð um framtíð Hodgson

John Henry, eigandi Liverpool, vill ekki gefa nein loforð um framtíð Roy Hodgson sem knattspyrnustjóra liðsins.

Hodgson tók við Liverpool í sumar en liðið byrjaði skelfilega á leiktíðinni. Liverpool hefur hins vegar unnið síðustu þrjá leiki sína í öllum keppnum.

Henry keypti Liverpool í síðasta mánuði og var spurður að því hvort að Hodgson væri rétti maðurinn til að stýra liði Liverpool.

„Hann er það svo sannarlega eins og er," sagði Henry við enska fjölmiðla. „En ég get engu lofað um framtíðina því fyrir tveimur mánuðum síðan vissi ég lítið sem ekkert um enska knattspyrnu."

Henry er einnig eigandi bandaríska hafnaboltaliðsins Boston Red Sox.

„Við eigum það til að halda trú við okkar stjóra. Það var ekki Roy sem byggði þetta lið upp og því finnst mér að hann hafi fengið ósanngjarna gagnrýni í ár."

„Ég tel að það sé mitt hlutverk núna að veita honum allan þann stuðning sem ég get. Að hann fái það sem hann þarf til að ná þeim árangri sem hann vill ná. Það eru engar breytingar fyrirhugaðar."