Besta markvarsla mín á ferlinum - myndband

Ben Foster segir að skotið sem hann varði frá Carlton Cole í leik Birmingham og West Ham um helgina sé besta markvarsla sín á ferlinum.

Leiknum lauk með 2-2 jafntefli en Foster varði frábærlega í stöngina frá Cole af stuttu færi. „Þetta var líklega besta markvarsla mín á ferlinum," sagði Foster við enska fjölmiðla en hann gekk í raðir Birmingham í sumar frá Manchester United.

„Ég náði rétt svo að koma við boltann og hélt að boltinn væri á leiðinni á markið. Þetta var frábær tilfinning."

Þetta þykja þó ekki bestu tilþrif helgarinnar hér á Vísi en hér má sjá samantekt yfir fimm bestu markvörslur helgarinnar í ensku úrvalsdeildinni. Þar er Foster í öðru sæti en Ali Al-Habsi, markvörður Wigan, þótti sýna bestu tilþrifin um helgina.