Næsti forseti Bandaríkanna hugsanlega hershöfðingi

Þó svo að tvö ár eru í næstu forsetakosningarnar í Bandaríkjunum þá eru Repúblikanar engu að síður farnir að leita að nýrri vonarstjörnu. Sá sem þykir líklegur þessa stundina til þess að sækjast eftir útnefningu flokksins til þess að bjóða til fram til forseta undir þeirra merkjum er hershöfðinginn David Petraeus.

David varð heimsfrægur á svipstundu árið 2007 þegar Georg W. Bush, þáverandi forseti Bandaríkjanna, sendi hann til Írak til þess að koma í veg fyrir borgarastyrjöld. David þykir hafa sýnt góðan árangur í Írak og meðal aðdáanda hans er sjálfur forseti Bandaríkjanna og hugsanlegur keppinautur í framtíðinni, Barack Obama.

Samkvæmt úttekt Daily Telegraph þá hefur David neitað því hingað til að hann hyggist gefa kost á sér. Það sé þó eitthvað sem frambjóðendur geri ávallt til að byrja með.

Aftur á móti vekur athygli að David heldur ræðu Saint Anselm menntaskólanum í New Hampshire en þar hafa átta síðustu forseta haldið ræður áður en þeir komust að lokum til valda.

Það þykir því ekkert launungarmál að David er að gæla við að gefa kost á sér sem forseti Bandaríkjanna árið 2012.

Repúblikana standa á krossgötum eftir að þeir töpuðu fyrir Obama í síðustu kosningum. Ólíklegt þykir að Mitt Romney, sem sóttist eftir tilnefningu flokksins árið 2008, bjóði sig fram. Ástæðan er sú að hann á erfitt með að tengjast almennum kjósendum, hann nær frekar til hástéttarinnar.

Þá nefna margri Söruh Palin sem sló heldur betur í gegn í síðustu kosningum sem varaforsetaefni. Hún er reyndar sökuð um að hafa kostað flokkinn sigurinn. Því telja flestir að hún sé of umdeild þrátt fyrir að ný hreyfing innan flokksins sem kallast, Tea party, líki vel við hana.

Sjálfur hefur David Petraeus lýst sér sjálfum sem Rockafeller-repúblikana. Það er að segja, stjórnmálamaður sem er ekki algjörlega andsnúinn þeim kapítalisma sem hefur viðgengist í Bandaríkjunum undanfarin ár. Það aftur á móti gæti styggt Tea-party hreyfinguna sem hefur meðal annars gagnrýnt bónuskerfi og ríkisafskiptum af stórfyrirtækjum harkalega.

David þykir hinsvegar hafa víðtæka skírskotun til kjósenda í Bandaríkjunum. Þá helst á þeim forsendum að hann getur fyllt þá öryggiskennd, sem skipti kanann miklu máli þessa daganna.