Reyndu að ræna formúlukappa

Heimsmeistarinn í Formúlu 1 kappakstrinum, Englendingurinn Jenson Button, slapp úr klóm glæpamanna í Sao Paulo í Brasilíu í gær. Sex vopnaðir menn gerðu tilraun til að stöðva bifreið Buttons þegar hann var á leið heim á hótel eftir æfingu fyrir Brasilíukappaksturinn. Formúlukappinn var í lögreglufylgd og komst óskaddaður heim á hótel.

Button er í 5. sæti í keppni um heimsmeistaratitilinn, 42 stigum á eftir Fernando Alonso og á því enn möguleika á því að verja titilinn sem hann vann í fyrra. Brasilíukappaksturinn verður sýndur beint á Stöð 2 sport frá klukkan 15:30 í dag.