Gerrard sér ekki eftir því að hafa hafnað Chelsea

Steven Gerrard, fyrirliði Liverpool, sér alls ekki eftir því að hafa hafnað Chelsea á sínum tíma en þessi lið mætast í ensku úrvalsdeildinni í dag.

Fyrir nokkrum árum íhugaði Gerrard alvarlega að fara frá Liverpool og taka tilboði Chelsea sem vildi fá hann.

Chelsea er núverandi Englandsmeistari en Gerrard er enn að bíða eftir sínum fyrsta meistaratitli hjá Liverpool.

„Ég held að það sé ekki rétt að segja að það hafi verið fórn af minni hálfu að vera áfram hjá Liverpool," sagði hann í samtali við enska fjölmiðla.

„Það er ekki fórn að spila með Liverpool og vera fyrirliði liðsins - það heitir að fá að uppfylla drauminn."

„Auðvitað hafa önnur félög komið til sögunnar í gegnum tíðina og ég hef fengið tækifæri til að fara annað - til Chelsea og annarra félaga. En ég elska þetta félag. Hér vil ég vera og ná árangri því ég veit að þegar sá dagur kemur þá mun ekkert jafnast á við það."

Nýverið fékk Liverpool nýja eigendur - bandaríska eignarhaldsfélagið NESV með John Henry í forgrunni.

„Það er rétt hjá Bandaríkjamönnum að vilja byggja til framtíðar en ég vil ná árangri strax þar sem ég á aðeins fjögur eða fimm ár eftir í þessum gæðaflokki. Ég vil vinna titla áður en ferlinum lýkur. Þess vegna fer ég í vinnuna á hverjum degi."

„Síðustu tólf mánuðir hafa verið þeir erfiðustu síðan ég var átján ára gamall og vann mér sæti í aðalliðinu í fyrsta sinn."

„Við urðum í sjöunda sæti deildarinnar á síðasta tímabilinu og það var mikið sem gekk á á vellinum. Vonandi er þessu öllu saman lokið og við getum leyft okkur að halda áfram."