Heiðar klár en verður líklega á bekknum

Heiðar Helguson er orðinn klár í slaginn eftir að hafa verið frá vegna meiðsla á öxl síðustu vikur.

Heiðar hefur ekkert spilað í rúman mánuð með liði sínu, QPR, í ensku B-deildinni. QPR vann um síðustu helgi 3-1 sigur á Preston þar sem að Rob Hulse skoraði eitt markanna og heldur hann væntanlega sæti sínu í byrjunarliðinu. Það þýðir líklega að Heiðar þarf að sætta sig við að byrja sem varamaður um helgina.

QPR er í efsta sæti deildarinnar en mætir á morgun Cardiff sem er í öðru sætinu. QPR hefur enn ekki tapað á leiktíðinni en hefur gert átta jafntefli í alls átján leikjum, þar af sex í síðustu átta leikjum.