Tilurð falska kúnnalistans kemur rithöfundi ekki á óvart

„Það er nefnilega svo að helstu andstæðingar nafn- og myndbirtingastefnu fjölmiðla eru Gróurnar," segir Jakob Bjarnar Grétarsson, blaðamaður og annar höfundur ævisögu Catalinu Ncogo, Hið svarta man, um falska kúnnalistann, sem birtist á netinu á dögunum.

Jakob segist hafa rekist á nokkur nöfn við vinnslu bókarinnar. Þau hafi hann séð í rannsóknargögnum lögreglunnar og snéri að millifærslum karlmanna inn á heimabanka Catalinu vegna meintra vændiskaupa. Hann segir þau nöfn ekki vera á listanum sem birtist á netinu.

„En svo því sé haldið til haga þá sagði Catalina okkur engin nöfn," segir Jakob en Catalina virðist hafa haldið trúnaði við viðskiptavini sína, en sumir þeirra voru ákærðir og hafa verið dæmdir fyrir að kaupa vændi, sem er refsivert.

Vísir ræddi við Svein Andra Sveinsson lögmann í dag. Hann sagði nokkra skjólstæðinga hafa haft samband við sig vegna þess að nafn þeirra mátti finna á listanum. Þeir ætla að kæra listann til lögreglunnar á þeim forsendum að það sé verið að bera á þá brigslur um saknæmt athæfi, en refsing liggur við slíkum ásökunum.

Það kemur hinsvegar Jakobi ekki á óvart að svona fals-listi komist í umferð. Dómari Héraðsdóms Reykjavíkur ákvað að nöfn þeirra sem yrðu dæmdir fyrir kaup á vændi yrði ekki birt. Undir sama sjónarmið taka ýmsir feministar, en þeir eru sammála Jakobi, á ólíkum forsendum þó.

„Það er sérdeilis undarlegt hvernig þetta getur æxlast: Hvernig fólk getur verið sammála um eitthvað á algjörlega öndverðum forsendum. Nú er ég þeirrar skoðunar að eina stefnan sem í raun stenst sé nafnbirtingastefna nema í algjörum undantekningartilfellum. Það tæki smá tíma fyrir fólk að átta sig á þessu, að nafnbirting í fjölmiðlum er ekki sama og dómur," segir Jakob og bætir við:

„Öfgafemínistarnir hins vegar vilja fá þessi nöfn fram, ekki af því að þeir séu almennt á því að nafnbirtingar í fjölmiðlum eigi rétt á sér, heldur þvert á móti: Álfheiður Ingadóttir, þá ráðherra og einn flutningsmaður þess frumvarps sem nú eru lög að vændiskaup séu refsiverð, hefur lýst því yfir að hún telji nafnbirtingar í þeim málaflokki hluti refsingar. Að mínu viti lýsir það svo kolsikk viðhorfum bæði til dómskerfisins sem og fjölmiðla - reyndar samfélagsins alls, að það setur að manni óhug," segir Jakob.

Sveinn Andri, lögmaður einstaklinga sem ætla að kæra málið, sagði í viðtali við Vísi fyrr í dag að hann vonaðist til þess að lögreglan hæfi sakamálarannsókn sem fyrst á málinu. Öll nöfnin eru fengin af vinalista Catalinu á Facebook.

Síðan sem um ræðir er af sama meiði og heimasíðan Ringulreið.org og var lokað af ríkislögreglustjóra og lögreglu á sínum tíma þar sem barnaklám mátti finna á síðunni.

Heimasíðan er samansafn af nafnlausum einstaklingum sem oftar en ekki birta klám og annað ósmekklegt efni á síðunni. Síðan er af erlendri fyrirmynd og eru þær oft kallaðar chan-síður í daglegu tali.