Roeder varar Capello við Carroll

Glenn Roeder, fyrrum knattspyrnustjóri Newcastle, hefur varað við því að Andy Carroll fái að spila með enska landsliðinu gegn Frökkum í næstu viku.

Carroll hefur staðið sig vel með Newcastle á leiktíðinni og skoraði sigurmarkið í 1-0 sigri á Arsenal um helgina.

Hann hefur hins vegar lent í miklum vandræðum utan vallar og ítrekað lent í kastljósi fjölmiðla fyrir hegðun sína.

„Ég myndi velja hann í hópinn en ekki láta hann spila," sagði Roeder við enska fjölmiðla. „Ég er ekki viss um að hann sé að senda ungum leikmönnum góð skilaboð með hegðun sinni."

„Ef hann verður valinn væru skilaboðin þau að það skiptir engu máli hvernig leikmenn haga sér, þeir geta samt komist í enska landsliðið."

„Hann er frábær á æfingasvæðinu og öllum þjálfurum líkar vel við að þjálfa hann. En hann gæti staðið enn betur undir þeim væntingum sem gerðar eru til hans með því að vera aðeins rólegri utan vallar."