Chelsea íhugar að fara frá Stamford Bridge

Enska blaðið Guardian greinir frá því í dag að forráðamenn Chelsea íhugi nú að hætta að spila á Stamford Bridge og byggja nýjan leikvang í Earls Court-hverfinu í Lundúnum.

Roman Abramovich, eigandi Chelsea, mun nú vera að skoða það að reisa nýjan leikvang sem gæti tekið um 60 þúsund áhorfendur í sæti. Sá yrði í minna en kílómetra fjarlægð frá Stamford Bridge þar sem Chelsea hefur spilað undanfarin 105 ár.

Þetta er ekki einsdæmi í ensku úrvalsdeildinni enda er ekki langt síðan að Arsenal flutti heimavöll sinn frá Highbury á Emirates-leikvanginn og þá hefur lengi verið í umræðunni að Liverpool muni flytja frá Anfield og reisa nýjan leikvang í Stanley Park.

Stamford Bridge tekur rúmlega 40 þúsund manns í sæti og segir Bruce Buck, stjórnarformaður Chelsea, ekki hægt að spá um framtíð vallarins.

„Við myndum aldrei fara frá vesturhluta Lundúna og það eru afar fá svæði sem standa okkur til boða," sagði Buck. „Það er gerir okkur mjög erfitt fyrir þegar kemur að því að taka ákvörðun í þessum efnum."

Ef af þessu verður gæti nýi völlurinn sennilega ekki verið tilbúinn fyrr en árið 2015.