Sagði Barcelona að kaupa Bale fyrir þremur árum síðan

John Toshack, fyrrum landsliðsþjálfari Wales, mælti með því að Barcelona keypti Gareth Bale frá Southampton áður en hann gekk til liðs við Tottenham.

Toshack var einnig þjálfari Real Madrid á sínum tíma en Bale hefur slegið í gegn með Tottenham og er einn heitasti leikmaður Evrópu um þessar mundir.

Toshack valdi Bale fyrst í velska landsliðið aðeins sextán ára gamall og mælti með honum við Txiki Begiristain, þáverandi yfirmann íþróttamála Barcelona.

„Ég sagði að ég væri með afar áhugaverðan leikmann sem væri að vekja mikla athygli," sagði Toshack í samtali við spænska útvarpsstöð í gær.

„Barcelona er best og Bale er sá besti í sinni stöðu. Ef Lionel Messi er frábær í þröngu svæði er Bale frábær í opnu svæðunum. Hann er afar snöggur."

Bale kom til Tottenham frá Southampton árið 2007 fyrir sex milljónir evra.