Innlent

Talsmaður neytenda vill lögbann á gengislán

Gísli Tryggvason, talsmaður neytenda.
Gísli Tryggvason, talsmaður neytenda.

Talsmaður neytenda, Gísli Tryggvason, hefur óskað eftir heimild til þess að grípa til lögbanns til varnar neytendum hjá dómsmála- og mannréttindaráðherra.

Hann ritaði ráðherra bréf þar sem farið var fram á þessa heimild fyrir embættið til þess að leita lögbanns eða höfða dómsmál í þágu heildarhagsmuna neytenda.

Ástæðan fyrir því að talsmaður neytenda krefst heimildarinnar er nýfallinn dómur Hæstaréttar en Seðlabanki Íslands og Fjármálaeftirlitið beindu þeim tilmælum til fjármálafyrirtækja í gær að miða við lægstu seðlabankavexti þegar lánin væru reiknuð út.

Talsmaður neytenda telur þessi tilmæli brjóta í bága við stjórnarskránna og samningslög.

Að lokum segir Gísli:

„Hefur talsmann neytenda í ýmsu tilliti skort úrræði til þess að fylgja eftir þessum lögbundnu verkefnum sínum en eins og kunnugt er ræður embættið yfir þekkingu á þessu sviði. Því hefur embættið mótað þá stefnu að fá slíka heimild auk lagaheimildar til þess að höfða hópmál ef réttarfarslögum verður breytt í þá veru."

Þess má geta að ASÍ og FÍB hafa yfir að ráða slíkri heimild. Hún hefur hinsvegar aldrei verið nýtt.

Hægt er að lesa beiðni talsmanns neytenda í heild sinni hér.


Tengdar fréttir

Dómstólar eiga síðasta orðið

Í yfirlýsingu ríkisstjórnarinnar vegna tilmæla Seðlabankans og Fjármálaeftirlitsins um gengistryggð lán segir að þótt tímabundin óvissa ríki um endanlega niðurstöðu dómstóla sé mikilvægt að stöðuleiki á fjármálamarkaði verði áfram tryggður. Ríkisstjórnin virðir sjálfstæði Seðlabankans og Fjármálaeftirlitsins og ber fullt traust til þessara stofnana við að sinna lögbundnu hlutverki sínu. Dómstólar eigi þó síðasta orðið varðandi réttarágreining sem enn er uppi vegna lánanna.

Fimmtíu milljarðar færast á neytendur

Eftirlitsstofnanir telja ófært að miða við samningsvexti þegar myntkörfulán verða endurreiknuð og mælast til að Seðlabankavextir verði viðmiðið. Samtök neytenda fordæma tilmælin og segja þau á skjön við lög um neytendavernd.

Tilmælin eiga að skapa festu í viðskiptum og traustu fjármálakerfi

Arnór Sighvatsson, aðstoðarseðlabankastjóri, segir að tilmæli Fjármálaeftirlitsins og Seðlabankans til fjármálafyrirtækja vegna óskuldbindandi gengistryggingarákvæða sé ætlað að skapa festu í viðskiptum og stuðla að öruggu fjármálakerfi. Með tilmælunum séu FME og Seðlabankinn að sinna þeirri lagaskyldu sem á þeim hvílir. Hann segir brýna almannahagsmuni krefjast þess að Seðlabankinn og Fjármálaeftirlitið setji fram almennar leikreglur sem varðveiti stöðugleika á meðan greitt sé úr réttaróvissu.

Enn þarf Hæstiréttur að úrskurða

Seðlabankinn og Fjármálaeftirlitið telja sig vera að gegna skyldu sinni, að gæta stöðugleika fjármálakerfisins, með útgáfu tilmæla til fjármálastofnana í gær um útreikning gengistryggðu lánanna, sem Hæstiréttur hafði dæmt að færu í bága við lög.

Segja tilmæli Seðlabanka „sorgleg“ og „út í hött“

Talsmenn skuldara segja að Fjármálaeftirlitið og Seðlabankinn gangi erinda fjármála og fjármögnunarfyrirtækja með tilmælum sínum sem séu sorgleg og út í hött. Þeir hvetja lánþega til að greiða ekki. Forstjóri FME segir að greiðsla í samræmi við tilmælin feli ekki í sér samþykki á nýjum lánaskilmálum.

Hvetur neytendur til þess að bíða átekta

„Ég hvet neytendur til þess að bíða átekta,“ segir Gísli Tryggvason, talsmaður neytenda, um tilmæli Seðlabanka Íslands og Fjármálaeftirlitsins sem voru kynnt í morgun.

Lilja Mósesdóttir: Það á allt eftir að loga í málaferlum

„Það á allt eftir að loga í málaferlum,“ segir Lilja Mósesdóttir, þingmaður Vinstri grænna, um tilmæli Seðlabankans og Fjármálaeftirlitsins um að lánastofnanir eigi að fylgja óverðtryggðum vöxtum Seðlabankans, í stað samningsvaxta gengistryggðra lánasamninga.

Samningar verði endurreiknaðir miðað við vexti Seðlabankans

Fjármálaeftirlitið og Seðlabanki Íslands hafa sent fjármálafyrirtækjum þau tilmæli að þeim beri að endurreikna þau lán sem innihalda gengistryggingarákvæði sem eru óskuldbindandi samanber dóma Hæstaréttar. Ekki verði miðað við upphaflega vexti lánanna sem í mörgum tilvikum voru í kringum þrjú prósent, heldur vexti sem Seðlabankinn ákveður með hliðsjón af lægstu vöxtum sem nú gilda á lánamarkaði. Á vef Seðlabanka Íslands kemur fram að lægstu vextir á almennum óverðtryggðum útlánum er um 8,25% en á verðtryggðum lánum eru vextirnir 4,80%.

Íslandsbanki segist ráða vel við gengisdóm

Íslandsbanki getur vel lifað af áhrifin af gengisdómi Hæstaréttar. Bankinn hefur á síðustu dögum farið vandlega yfir dómsniðurstöðu Hæstaréttar vegna gengistryggðra bílalána og metið hugsanleg áhrif Hæstaréttar á eigið fé Íslandsbanka.

Gengislánin: Vildi ekki lögfræðiálit

Viðskiptaráðherra taldi ekki ástæðu til að fá lögfræðiálit á gengistryggðum lánum þar sem málið væri fyrir dómstólum. Eygló Þóra Harðardóttir, þingkona Framsóknarflokksins, gagnrýnir ríkisstjórnina fyrir andvaraleysi.

Segir Seðlabankann og FME hvetja til lögbrota

„Ég fæ ekki betur séð en að Seðlabankinn og Fjármálaeftirlitið séu að hvetja til lögbrota," segir Marinó G. Njálsson, hjá Hagsmunasamtökum heimilanna, um tilmæli sem Seðlabankinn og FME beina til fjármálafyrirtækja vegna gengistryggðra lánasamninga og var tilkynnt um í morgun.

Segja seðlabankann og FME hafa lýst yfir stríði

Samtök lánþega segja í yfirlýsingu að Seðlabanki og FME hafi í raun lýst yfir stríði á hendur almennum borgurum þessa lands með tilmælum sínum sem eftirlitsstofnanirnar tilkynntu í morgun. Þar var þeim tilmælum beint til fjármálafyrirtækja að fylgja vöxtum seðlabankans í stað þess að reikna úr lánin út frá samningsvöxtum. Vextir seðlabankans eru 8,25 prósent.

Segja ákvörðun FME og Seðlabankans vonbrigði

Neytendasamtökin segja tilmæli Seðlabanka Íslands og Fjármálaeftirlitsins vonbrigði. Neytendasamtökin hafa áður gefið út yfirlýsingu þar sem þau sögðu að samningsvextir ættu að standa þrátt fyrir að Hæstiréttur hefur dæmt gengistryggingu króna við erlendan gjaldmiðil ólögmæta.

Mest lesið


Fleiri fréttir

Sjá meira


×

Mest lesið