Síðbúnu réttlæti fagnað í Argentínu

Jorge Videla, leiðtogi herforingjastjórnarinnar í Argentínu árin 1976-81, var í gær dæmdur í ævilangt fangelsi fyrir pyntingar og morð á 31 fanga, sem flestir voru á sínum tíma sagðir hafa verið „skotnir á flótta“ fyrstu mánuðina eftir byltingu herforingjanna.

Ættingjar og ástvinir fanganna myrtu fögnuðu ákaft niðurstöðu dómsins.

„Réttlætið er það eina sem við eigum eftir í lífinu,“ segir Nair Amuedo, ein mæðranna frá Plaza de Mayo, samtökum mæðra sem barist hafa áratugum saman fyrir því að herforingjarnir yrðu látnir gjalda fyrir verk sín.

„Að minnsta kosti eru þessir morðingjar fordæmdir fyrir það sem þeir eru,“ segir hún.

Videla var leiðtogi herforingjabyltingarinnar árið 1976. Hann stjórnaði síðan glæpaverkum herforingjastjórnarinnar næstu fimm árin og er talinn helsti forsprakki „óhreina stríðsins“, sem fólst í því að þúsundir manna voru „látnar hverfa“.

Herinn beindi þar spjótum sínum að vopnuðum skæruliðum, sem börðust gegn herforingjastjórninni, og öllum sem sýndu málstað uppreisnarmanna minnsta skilning. Líklegt þykir að flestir þeirra sem „hurfu“ hafi verið teknir af lífi.

Dómstóllinn komst að þeirri niðurstöðu að Videla hefði borið ábyrgð á dauða fanganna, sem voru fluttir úr venjulegu fangelsi yfir í annað húsnæði þar sem þeir voru pyntaðir hvað eftir annað áður en þeir voru drepnir.

Við réttarhöldin sýndi Videla enga iðrun, heldur sagði að almenningur í Argentínu hefði á sínum tíma krafist þess að stjórn herforingjanna léti til skarar skríða gegn skæruliðunum til að koma í veg fyrir að marxistar næðu völdum með stjórnarbyltingu. Hann kvartaði einnig undan því að „hryðjuverkamenn“ væru nú við völd í landinu.

Videla hefur áður hlotið ævilangt fangelsi fyrir brot gegn mannkyninu. Þá fékk hann að afplána dóminn í þægilegu húsnæði og slapp út eftir fimm ár þegar Carlos Menem, þáverandi forseti, náðaði hann og aðra leiðtoga herforingjastjórnarinnar. Í þetta skiptið þarf Videla að sitja í venjulegu fangelsi innan um aðra glæpamenn. Hann á auk þess fleiri réttarhöld í vændum, því enn bíða hans meira en tíu dómsmál vegna glæpa herforingjastjórnarinnar. gudsteinn@frettabladid.is