Grant heldur starfinu þó svo að West Ham falli

David Gold, eigandi West Ham, segir að Avram Grant verði áfram knattspyrnustjóri liðsins þó svo að liðið muni falla úr ensku úrvalsdeildinni í vor.

Grant tók við liðinu í sumar en West Ham, undir stjórn Gianfranco Zola, tókst naumlega að bjarga sér frá falli á síðustu leiktíð. Liðið er nú í neðsta sæti deildarinnar.

„Mér þætti það hræðilegt ef Avram Grant verði ekki með okkur næstu þrjú, fjögur, fimm eða sex árin," sagði Gold við enska fjölmiðla. „Við munum halda fullri tryggð við stjórann okkar, sama hvað gerist."