Bale: Maicon er herramaður

Gareth Bale lofaði Brasilíumanninn Maicon sem hann fór illa með í leik Tottenham og Inter í Meistaradeild Evrópu á þriðjudagskvöldið.

Maicon var lofaður mikið fyrir frammistöðu sína á síðasta tímabili er Inter vann þrefalt sem og fyrir leiki sína með brasilíska landsliðinu á HM í sumar.

„Hann baðst afsökunar í hvert skipti sem hann sparkaði í mig og meira var það ekki í rauninni. Hann er mjög indæll náungi," sagði Bale í samtali við enska fjölmiðla.

„En ég held að allir Brasilíumenn séu þannig. Þeir eru mjög almennilegir. Heurelho Gomes [markvörður Tottenham] hrósar mönnum alltaf eftir leiki."