Gummi Ben: Þetta gefur okkur þrjú stig og það er mikið fyrir okkur

Guðmundur Benediktsson, þjálfari Selfoss, hélt greinilega rosalega ræðu í hálfleik á leik liðsins við Keflavík í kvöld. Keflavík var með öll völd á vellinum og 2-0 forustu í hálfleik en Selfoss skoraði þrjú mörk í seinni hálfleik og tryggði sér gríðarlega mikilvægan sigur.

„Ég er gríðarlega stoltur af strákunum og hér sýndu menn ótrúlegan karakter í seinni hálfleik. Við rúlluðum aðeins yfir það í leikhléinu hvernig menn vildu muna eftir fyrsta leiknum á þessum velli og það sýndi sig bara í seinni hálfleik hvernig við ætluðum að muna eftir honum. Þetta var frábær endurkoma gegn sterku Keflavíkurliði sem fór illa með okkur í fyrri hálfleik. Við sýndum sem betur fer klærnar í seinni hálfleik, gerðum þrjú góð mörk og erum gríðarlega sáttir," sagði Guðmundur.

„Keflavík spilaði feykivel í fyrri hálfleik og betur en við. Í seinni hálfleik vorum við bara sterkari aðilinn. Maður getur kannski ekki ætlast til þess að gera þrjú mörk í einum hálfleik á móti svona liði eins og Keflavík en við gerðum það í dag og maður getur því ekki annað en verið glaður og gríðarlega stoltur," sagði Guðmundur sem var ánægður með framherjana Viktor Unnar Illugason og Viðar Örn Kjartansson sem gerðu útslagið í lokin.

„Viktor gerir mark og leggur upp mark fyrir Viðar. Viðar nær í vítið og skorar síðan sigurmarkið. Viðar er frábær knattspyrnumaður og frábær sóknarmaður. Hann er að koma úr erfiðum meiðslum en ég vissi að hann yrði hungraður á sínum velli og í sínu bæjarfélagi að koma hér inn og skora í sínum fyrsta leik á þessum velli," sagði Guðmundur.

Og hvaða þýðingu hefur þetta fyrir Selfossliðið?

„Þetta gefur okkur þrjú stig og það er mikið fyrir okkur," svaraði Guðmundur að bragði.