Feðgum smyglað frá Rússlandi

Deila er komin upp milli finnskra og rússneskra stjórnvalda eftir að sendiráðsstarfsmaður Finna í Sankti Pétursborg í Rússlandi smyglaði nýlega föður og ungum syni hans frá Rússlandi yfir landamærin til Finnlands í skottinu á bíl sínum.

Rússar krefja Finna svara um hvort embættismaðurinn hafi verið að sinna embættisskyldum sínum þegar hann smyglaði feðgunum úr landi, að sögn Hufvudstadsbladet.

Rimma Salonen, sem er rússneskur ríkisborgari, fór með son sinn, Anton, frá Finnlandi til Rússlands fyrir rúmu ári án samþykkis föðurins og notaði til þess falska pappíra.

Hún fékk vinnu á leikskóla í borginni Nizhny Novgorod og settist þar að. Anton er finnskur ríkisborgari og hafði faðir hans fengið forræði yfir honum.

Paavo Salonen, faðir drengsins, kom ári síðar til Rússlands og fór með Anton í finnska sendiráðið í Sankti Pétursborg. Þar dvöldust þeir í þrjár vikur. Simo Pietiläinen, lögfræðingur í finnska sendiráðinu, taldi þá útséð um að faðirinn fengi lausn sinna mála svo að hann kom feðgunum fyrir í skottinu á bíl sínum og ók með þá til Finnlands.

Pietiläinen er enn opinberlega í þjónustu finnska utanríkisráðuneytisins en hefur verið sendur í leyfi og á ekki afturkvæmt til Sankti Pétursborgar. Rússar hafa mótmælt formlega við Alexander Stubb, utanríkisráðherra Finna. Stubb hefur á hinn bóginn sagt að stjórnvöld vilji finna lausn á málinu í friði og ró. - ghs