Flugslys Air France: Hugsanlega hryðjuverk

Tveir farþegar frönsku farþegaflugvélarinnar sem fórst yfir Atlantshafi í síðustu viku, höfðu tengsl við íslömsk hryðjuverkasamtök. Breskir fjölmiðlar greina frá þessu í dag en aldrei hefur verið útilokað að um hryðjuverk hafi verið að ræða.

Franskur leyniþjónustumaður komst að þessu er hann fór í gegnum farþegalista flugvélarinnar. Listinn innihélt nöfn tveggja farþega sem flokkaðir eru sem róttækir múslimar og voru þeir taldir líklegir til hryðjuverka á franskri grundu.

Verið er að vinna úr upplýsingum varðandi farþegana tvo, ásamt því að ná sambandi við fjölskyldumeðlimi þeirra.

Frökkum hefur margsinnis verið hótað af íslömskum hryðjuverkasamtökum á undanförnum misserum, þá sérstaklega eftir að franskt herlið var sent til Afganistan.

228 manns týndu lífi í flugslysinu, en flugvélin var á leið frá Rio de Janeiro í Brasilíu til Parísar.