Viðbrögð helstu aðila: Sáttamáli um framfarir en ekki stöðnun

Fjölmargir aðilar koma að undirritun stöðugleikasáttmálans sem var undirritaður í Þjóðmenningarhúsinu rétt fyrir klukkan tvö í dag. Við það tækifæri tjáðu ýmsir sig um samninginn og sagði Jóhanna Sigurðardóttir að um tímamótaviðburð væri að ræða. Aldrei hefði verið mikilvægara að undirrita slíkan sáttmálan en einmitt nú og hann væri lykilatriði í endurreisninni.

Við undirritunina var létt yfir mannskapnum en það voru aðilar vinnumarkaðarins ásamt ríkisstjórninni sem undirrituðu samninginn.

Gylfi Arnbjörnsson forseti ASÍ sagði að verkalýðshreyfingin hefði lagt mikið á sig við gerð þessa samnings og þakkaði gagnaðilum sínum kærlega fyrir samstarfið. Tiltók hann þá sérstaklega samstarfið við ríkisstjórnina sem hann sagði að hefði verið til fyrirmyndar, en hann væri þá að miða við samskipti við ríkisstjórnir fyrri ára í því sambandi.

Eiríkur Jónsson formaður Kennarasambandsins sagðist vona að samningurinn myndi leiða til betri kjara og þá um leið betra lífs. Hann sagði þó að á endanum yrði það sagan sem myndi dæma um hversu vel þetta samkomulag myndi reynast.

Vilhjálmur Egilsson framkvæmdarstjóri Samtaka atvinnulífsins sagði þetta vera sáttmála um framfarir en ekki stöðnun og sem slíkur væri hann mjög mikilvægur.

Hann sagði Samtök atvinnulífsins hafa lagt mikla áherslu á að árangur næðist í ríkisfjármálum og hömlum á gjaldeyrisviðskiptum yrði aflétt. Einnig sagði hann lykilatriði að vextir yrðu lækkaðir. Vilhjálmur sagði einnig að það væri sín von að þær hörmungaspár sem landsmenn stæðu nú frammi fyrir myndu ekki rætast en til þess væri sáttmálinn einmitt gerður, það er að segja til þess að koma í veg fyrir það.