Trjábolum stolið eftir skipsstrand í Noregi

Nokkru magni af trjábolum, sem fóru í sjóinn þegar norska flutningaskipið Mirabelle strandaði við Bømlo syðst í Noregi á föstudag, hefur verið stolið.

Við strandið fóru um 1.200 trjábolir í sjóinn og þegar tryggingafélagið, sem eignaðist bolina sjálfkrafa við tjónið, sendi mannskap á vettvang til að bjarga því sem bjargað yrði úr sjónum, hitti björgunarliðið fyrir fólk sem var í óða önn að sanka timbrinu að sér. Reiknað er með að þjófarnir þurfi að standa tryggingafélaginu reikningsskil gjörða sinna.