50 látnir eftir jarðskjálftann á Ítalíu

Að minnsta kosti fimmtíu manns létu lífið í jarðskjálfanum sem reið yfir mið Ítalíu í nótt. Hundruð bygginga hrundu til grunna. Björgunarsveitir eru nú að leita í rústum hundruða húsa og er búist við að tala látinna eigi eftir að hækka, jafnvel verulega.

Mesta manntjónið varð í bænum L´Aguila þar sem íbúar eru um 68 þúsund talsins. L´Aguila er um 100 kílómetra austan við Róm og skammt frá upptökum jarðskjálftans. Hann reið yfir um hálf tvö í nótt þegar flestir íbúanna voru í fastasvefni.

Skjálftinn er talinn hafa verið um 6,7 á Richter kvarða og átt upptök sín á tíu kílómetra dýpi.

Í L´Aguila hrundu hundruð húsa til grunna og sem dæmi má nefna að fjögurra hæða íbúðablokk var ekki nema rétt mannhæðarhá eftir skjálftann.

Björgunarsveitir eru enn að streyma á skjálftasvæðið. Silvio Berlusconi forsætisráðherra Ítalíu frestaði heimsók til Moskvu og hefur lýst yfir neyðarástandi.

Það opnar fyrir opinbert fé til björgunarstarfa og uppbygginar þegar þar að kemur.