Ónæmisfræðingur gengur aftur á heimili sínu

Grunur leikur á að enski sveitalæknirinn og vísindamaðurinn Edward Jenner gangi aftur á fyrrum heimili sínu.

Dr. Jenner bjó í Glósturskíri á Suðvestur-Englandi og lést þar árið 1823. Hann vann sér það einkum til frægðar að uppgötva bólusetningu gegn bólusótt með því að nota vægt afbrigði kúabóluveirunnar og er talinn faðir ónæmisfræðinnar.

Stórmerkileg uppgötvun á sínum tíma auðvitað en mörgum þykir þó merkilegri myndin sem Telegraph birtir í dag og er talin vera af Jenner framliðnum. Heimili læknisins var breytt í safn til minningar um hann nokkru eftir andlát hans og er allt þar með sem upprunalegustu sniði.

Chris Sandys, ljósmyndari frá BBC, átti leið um safnið fyrir skömmu og var að taka myndir á háaloftinu. Á einni myndanna birtist ógreinileg mannsmynd í næsta herbergi sem virðist í fljótu bragði vera maður sem situr í stól. Sjálfur segist Sandys ekki trúa á drauga en viðurkennir þó að fyrirbærið á myndinni sé allrar athygli vert.

Safnstjórinn Sarah Parker segir í samtali við Telegraph að lengi hafi það verið hald manna að reimt væri á safninu en það hafi þó að jafnaði meira verið haft í flimtingum. Sannast þar hið fornkveðna að öllu gamni fylgir nokkur alvara.