Bretar geta flett glæpamönnum í hverfinu upp

Breski dómsmálaráðherrann Jack Straw mun á morgun kynna áætlun ríkisstjórnarinnar um að koma upp gagnagrunni á Netinu þar sem fletta má upp dæmdum afbrotamönnum í ákveðnum hverfum. Með þessu eiga íbúar að geta áttað sig á því hvers konar nágranna þeir eigi.

Þetta er auðvitað ekki átakalaust og hafa mannréttindasamtök gagnrýnt væntanlegan gagnagrunn harðlega og kallað hann innrás í einkalíf brotamanna. Höfundar gagnagrunnsins svara því hins vegar til að kerfið kunni engin önnur úrræði til að veita borgurunum upplýsingar um hverjir dvelji í næstu húsum og það verði bara að hafa það þótt ruðst sé inn í einkalíf hinna brotlegu. Eftir allt saman séu þeir nú einu sinni brotlegir.

Kerfisfræðingarnir ganga jafnvel svo langt að bjóða upp á myndir af brotamönnum á síðunni svo allt liggi nú klárlega fyrir. Þá hafa aðrar frumlegar tillögur litið dagsins ljós, til dæmis þær að afbrotamönnum sem gegni samfélagsþjónustu verði gert að ganga í sérstökum fatnaði sem gefi það til kynna að þeir hafi villst af veginum mjóa.