Given íhugar framtíð sína

Shay Given, markvörður Newcastle, mun vera að íhuga framtíð sína eftir því sem fram kemur í yfirlýsingu frá lögfræðingi hans.

Í yfirlýsingunni sagði að Given sé óánægður með stöðu félagsins bæði innan og utan vallar. Einnig að 5-1 tap Newcastle fyrir Liverpool hafi verið lágpunktur ferils síns.

„Það eina sem blasir við með vandræðin sem ríkja bæði innan og utan vallar hjá félaginu er fallbarátta," sagði í yfirlýsingunni. „Shay varð fyrir miklum vonbrigðum með slaka frammistöðu liðsins gegn Liverpool um síðustu helgi. Það var lágpunktur ferils hans og óskar hann þess að sú frammistaða verði ekki endurtekin."

„Þar sem Shay hefur verið tryggur þjónn Newcastle í ellefu ár finnst honum að nú þurfi hann að velta fyrir sér sinni stöðu í ljósi þess áhuga sem Manchester City, Arsenal og Tottenham hafa sýnt honum."

Given hefur leikið 459 leiki með Newcastle síðan hann gekk til liðs við félagið frá Blackburn árið 1997.