Maður laumaðist til Aung San Suu Kyi

Öryggisgæsla hefur verið hert við heimili fangelsaða stjórnarandstöðuleiðtogans Aung San Suu Kyi í Búrma. Óvæntur gestur mun hafa laumast inn í húsið þar sem hún er í stofufangelsi. Læknir hennar fékk fyrir vikið ekki að hitta hana fyrir helgi.

Flokkur Aung San Suu Kyi vann stórsigur í þingkosningum í Mjanmar, áður Búrma, fyrir 19 árum. Herforingjastjórn landsins neitaði að viðurkenna sigurinn og hefur haldið henni í stofufangelsi meira og minna síðan.

Fregnir bárust af því í gær að Suu Kyi væri veik. Læknir hennar fékk ekki að hitta hana á föstudaginn en hann hefur tekið hana í læknisskoðun í hverjum mánuði. Aðstoðarmaður læknisins fékk hins vegar að hitta hana. Sá sagði hana með of lágan blóðþrýsting og þjást af vökvatapi. Hann hafi gefið henni næringu í æð.

Talsmaður flokks Suu Kyi segir að nú þurfi ekki bara að hafa áhyggur af öryggi hennar heldur einnig heilsu.

Ekki er vitað hvort ástæða þess að læknirinn fékk ekki að hitta Suu Kyi hafi verið hert öryggisgæsla á heimili hennar eftir að bandarískur maður, John William Yettaw, synti yfir vatn við heimili hennar og laumaðist inn til Suu Kyi fyrir viku.

Heimili hennar stendur við stöðuvatn, um það er strangur lögregluvörður, gaddavírsgiriðing og vegatálmar. Íbúar í næsta nágrenni segja að fjölgað hafi í varðliðinu eftir fréttir af óvænta gestinum.

Yettaw er sagður hafa synti yfir vatnið og laumast inn til Aung San fyrir viku. Hann mun hafa verið handtekinn á leiðinni til baka á miðvikudagsmorguninn og því dvalið á heimili Suu Kyi í rúma tvo sólahringa.

Ekki hafa verið sögð nein deili á honum né hvaða erindi hann átti við hana.

Talsmaður bandaríska sendiráðsins segir að beðið hafi verið um að starfsmaður þess fái að hitta hann, eins og venja sé þegar bandarískir ríkisborgarar séu handteknir erlendis. Herforingjastjórnin hefur hafnað þeirri beiðni.