Flokkur Gordons Browns í lægstu lægðum

Verkamannaflokkur Gordons Browns, forsætisráðherra Bretlands, mælist nú í lægstu lægðum eftir afhjúpanir breska blaðsins Telegraph síðustu daga um endurgreiðslur af opinberu fé til þingmanna flokksins.

Samkvæmt nýrri könnun sem birt var í sunnudagsútgáfu breska blaðsins Mail í morgun nýtur Verkamannaflokkurinn aðeins 23 prósenta fylgis en Íhaldsflokkurinn nýtur stuðnings 45 prósent Breta. Það myndi tryggja Íhaldsmönnum stórsigur í kosningum.

Fram kemur einnig að 52 prósent Breta telja að Brown ætti að víkja.

Þetta eru verstu niðurstöður í skoðanakönnun fyrir Verkamannaflokkinn síðan 1943. Önnur könnun í sunnudagsútgáfu Times sýnir að Verkamannaflokkurinn er 16 prósentustigum á eftir Íhaldsmönnum með 27 prósenta fylgi. Stjórn Verkamannaflokksins getur í síðasta lagi boðað til kosninga um mitt næsta ár.