Barðist við Talibana í bleikum nærbuxum og inniskóm

Robert Gates, varnarmálaráðherra Bandaríkjanna, fór lofsamlegum orðum um bandarískan hermann í Afganistan sem kom hlaupandi beint úr rúminu fyrr í mánuðinum og réðst til atlögu við Talibana sem gerðu árás á herstöðina. Í stað hefðbundins herbúnings var maðurinn eingöngu klæddur bleikum boxer-nærbuxum og inniskóm og vakti uppákoman athygli fjölmiðla sem birtu myndir af tiltækinu. Gates sagði það bera vott um mikið hugrekki að ráðast gegn Talibönum í nærbuxum og inniskóm einum klæða og segist gjarnan vilja hitta hermanninn.