Eigendur Pirate Bay fengu ársfangelsi

Dómstóll í Stokkhólmi dæmdi fjóra, menn sem standa að baki Pirate Bay vefsíðunni, í eins árs fangelsi fyrir brot á höfundaréttarlögum. Talið er að dómurinn geti haft áhrif um allan heim.

Mennirnir voru einnig dæmdir til þess að greiða 30 milljónir sænskra króna, eða 450 milljónir íslenskra króna, í skaðabætur. Útgefendur kvikmynda, tónlistar og tölvuleikja höfðu krafist 120 milljóna sænskra króna, eða 1800 milljóna íslenskra króna, í skaðabætur.

Fréttastofa Sky segir að Pirate Bay vefsíðan sé höfuðandstæðingur höfundarréttarhafa því tugir milljóna manna hlaði niður tónlist, kvikmyndum og tölvuleikjum í gegnum síðuna.

Í tilkynningu sem SMÁÍS - Samtök myndrétthafa á Íslandi sendu frá sér vegna málsins er niðurstöðu dómsins fagnað.