Fundu elstu hljóðfæri heims

Vísindamenn í Þýskalandi segjast hafa fundið elstu hljóðfæri heims. Hljóðfærin eru þrjár flautur sem eru 35 þúsund ára gamlar.

Flauturnar fundust í helli í Suðvestur-Þýskalandi. Í hellinum hafa áður fundist minjar frá svipuðum tíma, meðal annars stytta af Venusi, sem er einnig talin sú elsta í heiminum.

Ein flautan er úr hrægammsbeini og hefur hún varðveist vel. Hinar tvær eru úr fílabeini en aðeins fundust hlutar þeirra. Flauturnar benda til þess að tónlistarflutningur hafi verið algengur á þeim tíma sem nútímamaðurinn fór að nema land í Evrópu.