Samkynhneigðum heimil herþjónusta í Uruguay

Samkynhneigðir munu brátt öðlast rétt til að gegna herþjónustu í Uruguay en það hefur verið bannað fram að þessu.

Tabare Vazquez forseti greindi frá þessari ákvörðun í gær en hingað til hafa reglur hersins sett samkynhneigð undir sama hatt og ýmsa sjúkdóma eða geðraskanir sem koma í veg fyrir að menn fái inngöngu í herinn. Réttindi samkynhneigðra hafa þokast upp á við í Uruguay undanfarin ár en í hitteðfyrra varð það fyrst Suður-Ameríkuríkja til að veita samkynhneigðum pörum sömu réttindi að lögum og hjón njóta.

Varnarmálaráðherrann Jorge Menendez sagði í útvarpsviðtali að nú væri tímabært að leiðrétta þá rótgrónu skoðun hermálayfirvalda að samkynhneigð bæri að skoða sem geðröskun en um það eru ekki allir sammála og á spjallsíðu úrúgvæskra hermanna á Netinu lætur einhver þau orð falla að stjórnvöld ráðist með ákvörðun sinni gegn hernum og veiki hann. Um 30.000 manns gegna herþjónustu í Uruguay en íbúar landsins eru í allt þrjár og hálf milljón.