Fylgismenn og andstæðingar Ahmadinejad tókust á

Stuðningsmönnum og andstæðingum Mahmoud Ahmadinejad, Íransforseta, lenti saman í höfuðborginni Teheran í gærkvöldi. Forsetakosningar í Íran fara fram í næstu viku.

Fylgismenn annars vegar forsetans og hins vegar umbótasinnans Mehdi Karoubi, sem einnig gefur kost á sér í kosningunum, tókust á Sarv-torginu í Teheran. Kveikt var í nokkrum bílum í látunum og þurfti lögregla að tvístra hinum andstæðu fylkingum í sundur.

Ahmadinejad og Karoubi mættust í sjónvarpskappræðum í gærkvöldi þar sem þeir ræddu allt frá utanríkismálum til efnahagsmála. Forsetakosningarnar verða 12. júní næstkomandi.