Loftflutningar hafa dregist saman um 23 prósent

Samdráttur í vöruflutningum með flugi hefur að líkindum náð botninum. Þetta segir Giovanni Bisignani, formaður Alþjóðaloftflutningasambandsins (IATA). Í janúar nam samdráttur í loftflutningum 23 prósentum síðan á sama tíma í fyrra og Bisignani telur minnst þrjá eða fjóra mánuði í að eitthvað taki að glæðast á ný á þessum vettvangi. Fjármálakreppunni er auðvitað kennt um en einnig háværum kröfum alþjóðasamfélagsins um minni mengun frá flugvélum. Stefnt er að því að draga úr menguninni um 20 prósent fyrir árið 2020 með bættri nýtingu eldsneytis.