Vill að Kínverjar geri grein fyrir blóðbaðinu á torginu

Hillary Clinton, utanríkisráðherra Bandaríkjanna, skorar á kínversk stjórnvöld að gera opinberlega grein fyrir blóðbaðinu á Torgi hins himneska friðar sem réttir tveir áratugir eru nú liðnir frá. Þá krefst Clinton þess að Kínverjar sleppi úr haldi þeim sem enn sitja í fangelsi vegna mótmælanna. Hún segir 20 ára afmæli þessara voveiflegu atburða vera tækifæri fyrir Kína til þess að ræða þá og gera hreint fyrir sínum dyrum. Umræða um það sem gerðist á torginu í júní 1989 ætti að sögn Clinton að vera Kínverjum jafnmikilvæg og umræða um efnahagsmál þjóðarinnar.