Týndi síma og fyrirfór sér

Verkfræðingi hjá kínverskum framleiðanda iPhone-síma varð svo mikið um þegar ný frumgerð símans týndist að hann stökk fram af tólftu hæð á vinnustað sínum.

Sun Danyong var 25 ára gamall og þótti ákaflega samviskusamur í starfi sínu sem hann sinnti af hinni mestu alúð. Danyong var nýútskrifaður úr verkfræðináminu og þótti það mikill hvalreki á fjörur farsímaframleiðandans Foxconn í borginni Shenzhen þegar hann hóf þar störf.

Eitthvað fór úrskeiðis þegar Danyong sendi 16 glæný eintök af frumgerð nýjustu útgáfu iPhone-símans til höfuðstöðva Apple í Bandaríkjunum sem á fyrirtækið í Kína. Af einhverjum ástæðum komust eingöngu 15 þeirra á leiðarenda en einn virtist hreinlega hafa gufað upp. Slíkt þykir alvarlegt mál hjá fyrirtæki sem gerir allt til að tækninýjungar leki ekki út áður en þær koma á markað og var Danyong kallaður á teppið og yfirheyrður um öll smáatriði málsins.

Fékk þetta svo á hann að hann fór upp á tólftu hæð byggingarinnar og kastaði sér fram af. Í kjölfarið fór fram ítarleg rannsókn og voru nokkrir starfsmenn, sem taldir voru geta borið ábyrgð á símahvarfinu, reknir. Stjórnarformaður Foxconn segir fyrirtækið munu greiða fyrir útför Danyongs en bætir því þó við að hann hafi ekki haft neitt leyfi til að fyrirfara sér.