Bresk hjón fundu kú í sundlauginni

Hjónum í bænum Whaddon á Suður-Englandi var brugðið þegar þau heyrðu eitthvað stórt falla ofan í sundlaugina í garði sínum. Enn meira brá þeim þegar þau þustu út í garð og fundu kú svamlandi um í sundlauginni. Kýrin hafði rutt sér leið gegnum limgerði hjónanna og dýft sér beint í laugina. Eftir nokkrar árangurslausar tilraunir til að koma dýrinu á þurrt ákváðu íbúarnir að hringja á slökkviliðið. Slökkviliðsmenn mættu tímanlega á staðinn til að sjá kúna brölta í rólegheitum upp úr lauginni eftir hressandi sundsprett.