Hefðu getað náð Watergate-málinu

Hugsanlegt er að blaðamennirnir Bernstein og Woodward hjá Washington Post hefðu aldrei komist á spjöld sögunnar hefðu tveir keppinautar þeirra fylgt ábendingum sem þeir fengu.

Robert Smith og Robert Phelps, sem störfuðu hjá New York Times árið 1972, hefðu að öllum líkindum skrifað bókina All the President's Men og verið söguhetjurnar í samnefndri kvikmynd Alans Pakula frá 1976 hefðu þeir bara fylgt eftir ábendingum sem þeir fengu á undan Bob Woodward og Carl Bernstein sem þeir Robert Redford og Dustin Hoffman túlkuðu svo eftirminnilega í kvikmyndinni.

Robert Smith segir frá því í grein í New York Times að Patrick Gray, sem stjórnaði alríkislögreglunni FBI árið 1972, hefði gefið honum mjög sterkar vísbendingar yfir hádegisverði 16. ágúst 1972. Gray hafi þá játað fyrir honum að saksóknari tengdist innbrotinu í Watergate-bygginguna 17. júní 1972 sem var byrjunarpunkturinn í málinu og að lokum hvíslað því að honum að málið teygði sig alla leið inn á skrifstofu Richards Nixon forseta.

Þetta var hins vegar síðasti dagur Smith á New York Times þar sem hann var að hefja laganám daginn eftir. Hann gerði því ekkert við þessar upplýsingar nema nefna þær við samstarfsmann sinn sem fylgdi þeim ekki eftir. Washington Post greip málið svo glóðvolgt eins og þeir vita sem til þekkja.