Obama hóf daginn á kirkjuheimsókn

Hinn nýi forseti Bandaríkjanna hóf daginn á því að fara í kirkju ásamt Bill og Hillary Clinton. Þaðan fór hann á skrifstofuna sína til þess að byrja að stjórna landinu.

Það er hefð fyrir því allt frá því Georg Washington fyrsti forseti Bandaríkjanna tók við embætti að forsetar hefji sinn fyrsta dag með bænasamkomu í dómkirkjunni í Washington.

Þangað komu forsetahjónin í morgun ásamt varaforsetahjónunum og tóku sér sæti við hliðina á Hillary Clinton utanríkisráðherra og Bill Clinton fyrrverandi forseta.

Á dagskrá hjá forsetanum í dag er auk þess fundur með efnahagsráðgjöfum og fjarfundur með herforingjum hans í Írak og Afganistan.

Þetta er svona nokkurnvegin í takt við forgangsröðun forsetans. Hann ætlar að leggja ofuráherslu á að endurreisa efnahag Bandaríkjanna.

Hann ætlar einnig að kalla hersveitir heim frá Írak og fjölga í herliðinu í Afganistan.

Barack Obama mun einnig heilsa upp á hundruð landa sinna því það er opið hús við Pennsylvaníu stræti númer 1600 í dag.