Ísraelar segjast farnir frá Gaza

Ísraelar segjast hafa lokið brottflutningi allra hermanna sinna frá Gaza ströndinni. Eyðileggingin er óskapleg.

Ísraelar höfðu flutt flestalla sína hermenn frá Gaza ströndinni áður en Barack Obama sór embættiseið sem forseti Bandaríkjanna. Fréttaskýrendur telja að þeir hafi vilja forðast spennu í upphafi samskipta sinna við hinn nýja forseta.

Ísraelar lýstu yfir einhliða vopnahléi á ströndinni í síðustu viku. Hamas samtökin sögðu þá að þau myndu gefa þeim vikufrest til að flytja hermenn sína á brott og ekki grípa til neinna hernaðaraðgerða á meðan.

Egyptar fara nú fyrir alþjóðlegum hópi sem reynir að koma á varanlegu vopnahléi á Gaza ströndinni.

Hamas liðar og aðrir Palestínumenn hafa svosem í nógu að snúast þótt þeir berjist ekki.

Eyðileggingin eftir 22 daga árásir Ísraela er skelfileg og ljóst að það mun taka bæði langan tíma og mikið fé að endurreisa þúsundir húsa sem voru annaðhvort lögð í rúst eða mikið skemmd.

Gangurinn á þeirri uppbyggingu á sjálfsagt eftir að vera enn eitt bitbein Ísraela og Hamas. Samtökin hafa krafist þess að landamæri verði opnuð til þess að hægt verði að flytja byggingarefni og aðrar nauðsynjar til strandarinnar.

Ísraelar munu ef að líkum lætur setja þau skilyrði fyrir opnun landamæranna að eldflaugaárásum verði hætt.