Harvard segir upp 275 manns

Harvard-háskólinn í Bandaríkjunum tilkynnti í gær að 275 manns yrði sagt upp þar á bæ, flestum af skrifstofum, í afgreiðslu og úr tæknistörfum hvers kyns. Uppsagnirnar fylgja í kjölfar 30 prósenta samdráttar fjárframlaga til skólans síðasta árið. Auk þeirra sem sagt verður upp verður 40 starfsmönnum gert að stytta vinnutíma sinn og þiggja þar með lægri tekjur. Starfslið Harvard telur 16.000 manns í allt og enn ein niðurskurðaraðgerðin felst í því að engin laun verða hækkuð þar að minnsta kosti næsta árið.