Grefur undan friði í heiminum

Norður-kóresk stjórnvöld undirbúa nú að skjóta annarri eldflaug á loft, þrátt fyrir alþjóðlega gagnrýni. Talið er að henni verði skotið á loft í kringum 16. júní og hún sé af sömu gerð og sú sem var skotið upp 5. apríl síðastliðinn.

Kjarnorkusprengja var sprengd neðanjarðar í Norður-Kóreu á mánudaginn í síðustu viku. Vaxandi áhyggjur eru meðal vestrænna þjóða yfir vígbúnaði Norður-Kóreumanna.

Alþjóðleg ráðstefna hefur staðið yfir í Suður-Kóreu að undanförnu til að ræða kjarnorku- og eldflaugatilraunir Norðursins. Niðurstaða opnunardagins var að þær græfu undan friði og stöðugleika í Norðaustur-Asíu og í heiminum öllum.

Talið er að eldflaugin sem skjóta á á loft 16. júní verði skotið á loft rétt við Dongchang-ni eldflaugastöðina sem er aðeins um 65 kílómetrum sunnan við landamærin að Kína.

Undirbúningur er kominn langt á leið. Eldflaugin er af gerðinni Taepodong-2 og dregur allt að 6.500 kílómetra, sem jafngildir rúmlega fjórum hringjum í kringum Ísland. Áður skaut Norður-Kórea eldflaug á loft 5. apríl. Sú eldflaug var látin fljúga yfir Japan áður en hún lenti í Kyrrahafinu.- vsp